به گزارش روز چهارشنبه ایرنا از خبرگزاری جمهور؛ «توماس نیکلسن» که امروز در دومین روز نشست امنیتی هرات در شهر دوشنبه تاجیکستان صحبت می‌کرد، خطاب به مقامات طالبان گفت: در صورتی که آنان حقوق اساسی مردم را رعایت نکنند، ما حتی می‌توانیم از طریق دادگاه بین‌المللی جرایم و وضع تحریم علیه آنها اقدام کنیم.
وی یاد آور شد که طالبان باید به مردم افغانستان پاسخگو باشد و توانایی و ظرفیت ارایه خدمات اساسی و عمده را کسب کند.
نیکلسن تاکید کرد که برای ایجاد افغانستان باثبات به احیای یک روند جدی و طولانی نیاز است.
این مقام اروپایی اضافه کرد، طالبان مسوولیت دارد تا حقوق شهروندان افغانستان را در پرتو تعهدات این کشور به قوانین بین‌المللی رعایت کند.
نشست امنیتی ۲ روزه هرات توسط انستیتیوی مطالعات استراتژیک افغانستان از روز گذشته در شهر دوشنبه پایتخت تاجیکستان آغاز شده است.
هرچند رقم دقیق شرکت کنندگان این نشست مشخص نیست؛ اما ده‌ها تن از مسوولان، کارشناسان و کارشناسان امور سیاسی از افغانستان، منطقه و جهان به این نشست دعوت شده‌اند.
نشست امنیتی امسال هرات با موضوع «نظام سیاسی همه‌شمول؛ الگوها و نقشه راه» برگزار می‌شود.